Үндсэн цэс
”Бүтээн байгуулалт- орон сууцжуулалт” сэдвээр нээлттэй хэлэлцлээ
Шинэчлэлийн Засгийн газраас  сар бүр зохион байгуулдаг “Шинэчилж шийдье-222”  нээлттэй хэлэлцүүлэг өнөөдөр “Бүтээн байгуулалт- орон сууцжуулалт” сэдвийн дор “МД Тоф констракшн” компанийн барилга угсралтын задгай талбайд өрнөлөө. Энэ онд ашиглалтад оруулахаар төлөвлөсөн болон  санхүүжилтийн асуудалтай байгаа 34,0 мянга орчим айлын орон сууцны 900,0 тэрбум төгрөгийн өртөг бүхий 110 гаруй төсөл арга хэмжээг үе шаттайгаар санхүүжүүлэх ажлыг Засгийн газраас банкуудаар дамжуулан зохион байгуулна.

576 айлын 16 давхар хоёр барилгын ажилд нийт 1000 гаруй монгол  залууг ажлын байраар хангаж, хөдөлмөрийн тааламжит нөхцөл бүрдүүлэх, ажилчдын орон сууц хангамжийг нэмэгдүүлэх зэргээр нийгмийн цогц асуудлыг шийдэж байгаа  “МД Тоф констракшн” компанийн удирдлагад Ерөнхий сайд Н.Алтанхуяг баяр хүргэлээ.

 “Шинэчилж шийдье-222”  нээлттэй хэлэлцүүлэгт Засгийн газрын гишүүд, Монголбанкны болон арилжааны банкнуудын удирдлага, барилга угсралтын компаниудын захирлууд, барилгын материал үйлдвэрлэлийн төлөөлөл оролцож,  орон сууцжуулах талаар төрөөс баримталж байгаа бодлого, барилгын салбарын   тулгамдсан асуудлууд,  шийдвэрлэх арга замын  талаар ярилцлаа.  2012 онд 11 000 айлын орон сууц ашиглалтад орсон бол 2013-2014 онд 34 000 айлын орон сууцны барилга ашиглалтад орно. Зарим хорооллын дэд бүтцийн асуудал шийдэгдэж байгаатай холбоотойгоор энэ тоо 40 000 хүрэх бололцоотой гэж Барилга, хот байгуулалтын сайд Ц.Баярсайхан хэллээ.  Хэлэлцүүлгээр орон сууц тойрсон олон асуудлаар ярилцсан ч орон сууцны санхүүжилтийн асуудал хэлэлцүүлгийн цөм нь байлаа.

Манай улсад орон сууцны санхүүжилтын асуудал 1990 оноос хойш хувийн хэвшилд тулгуурлан хөгжиж ирсэн бөгөөд барилгын  санхүүжилтийг хувийн хөрөнгө, захиалагчдын урьдчилгаа болон банкны зээлээр шийдвэрлэж ирсэн. 2012 оны байдлаар  иргэдийн орон сууцны зориулалтаар авсан зээлийн хэмжээ 845,0 орчим тэрбум төгрөгт хүрээд байна.

 Цаашид иргэдийг орон сууцжуулах,орон сууцны эрэлт, нийлүүлэлтийг дэмжих, санхүүжилтийн тогтвортой тогтолцоог бий болгох зорилгоор шинээр баригдаж, бүрэн ашиглалтад орсон, 80 м2 дээшгүй талбай бүхий орон сууц, эсвэл ашиглагдаж байгаа хуучин орон сууцнаас худалдан авахаар хүсэлт гаргасан, орон сууцны нийт үнийн дүнгийн 10-30 хувийн урьдчилгаа төлбөрийг төлсөн иргэдийг жилийн 8  хувийн хүүтэй, 20 хүртэлх жилийн хугацаатай, орон сууцны хөнгөлөлттэй зээлд хамруулах харилцааг зохицуулах журмыг баталсан нь иргэд болон барилга үйлдвэрлэгчдийн талархал хүлээсэн шийдвэр болсон талаар хэлэлцүүлэгт оролцогсод ярьж байна.

Сэтгэгдэл
Нийт: 1
Нэр:
Сэтгэгдэл:
  • zochin
    2013 оны 5 сарын 14
    8 huviin zeel hezeenees heregjih ve bas 6 huvi shig ulger bolood ba shuudee.8 huviin talaar yariad 2 sariin hugatsaa ongorch bna hurdan jurmaa gargaad ogch helehheregtei ogoh gj bn gseer btal ih udaj bn
Санал болгох
Бүх эрх хуулиар хамгаалагдсан. (c) www.time.mn